Një studim i ri zbuloi se pijet me sheqer lidhen me një rrezik në rritje të sëmundjeve të zemrës dhe mund të shkaktojnë vdekje në disa raste, sipas USA Today. Pas studimit të më shumë se 12,000 pjesëmarrësve me diabet të tipit 2, studiuesit nga Harvard TH Chan School of Public analizuan konsumin e tyre të sheqerit. Në hulumtimin e tyre të botuar në revistën The BMJ, studiuesit zbuluan se pacientët me diabet të tipit 2 që pinin pije të ëmbla rregullisht kishin një rrezik të lartë të sëmundjeve të zemrës. Po ashtu, u zbulua se ata gjithashtu mund të kenë vdekur më para në krahasim me ata që përdornin pije të tjera.
Marion Nestle, një profesoreshë e studimeve ushqimore në Universitetin e Nju-Jorkut, tha: “Kjo i shtohet një numri kërkimesh në rritje. Edhe pse është një mesazh për njerëzit me diabet që të përpiqen të kalojnë në pije që nuk kanë asnjë kalori ose sheqerna në to. Është një këshillë e mirë për të gjithë.”
Marrja e kontrolluar e sheqerit
Autorët e hulumtimit thanë se raporti përfshinte të dhëna nga viti 1980 deri në vitin 2018 dhe është ndër studimet e para në shkallë të gjerë për të ekzaminuar lidhjet midis vdekjes ose sëmundjes dhe pijeve te njerëzit me diabet të tipit 2.
Pijet e diskutuara në raporte janë cola me kafeinë dhe pa kafeinë, si dhe pije si lëng frutash, limonadë dhe pije me fruta si portokalli, molla dhe qitro. Në raport, u vu re se përdorimi i këtyre pijeve mund të rrisë rrezikun e vdekshmërisë nga të gjitha shkaqet në 8% në mesin e njerëzve me diabet të tipit 2. Megjithatë, hulumtimi rekomandoi gjithashtu që marrja ditore e sheqerit duhet të jetë më pak se 10% e kalorive të konsumuara, që është rreth 50 gram në ditë, tha Nestle.
Autori kryesor i studimit dhe profesori i asociuar në Departamentin e Ushqyerjes dhe Epidemiologjisë në Shkollën e Shëndetit Publik të Harvardit TH Chan, Qi Sun tha: “Njerëzit që jetojnë me diabet duhet të jenë të kujdesshëm për mënyrën se si e mbajnë veten të hidratuar. Kalimi nga pijet e ëmbla me sheqer në ato më të shëndetshme do të sjellë përfitime shëndetësore”.